Ernstige knelpunt het Centurion-inwoners raadop

In die onlangse Rekord is daar melding gemaak van die agteruitgang van munisipale dienste in Eldoraigne.

Daar is egter nog ’n ernstige knelpunt in Saxbylaan, wes van Ruimteweg, wat ek onder u aandag wil bring. Die DA-raadslid is bewus daarvan, maar o wee… Geen reaksie.

Eerstens is daar toestemming verleen aan ’n ambulans- en noodvoertuigmaatskappy om in Saxby/Cradocklaan te vestig.

Die reeds oorvol Saxbylaanverkeer moet soggens net koets vir noodvoertuie met loeiende sirenes wat doodsveragtend in die middel van die pad tussen die motors heen vleg.

Dit gebeur minstens drie keer vanaf 05:30 tot 08:30, die besigste tyd van die dag.

Tweedens is daar reeds versoek om spoedwalle/eilande aan te bring, maar die verskoning van die raad is dat dit nie aangebring kan word nie, omdat Saxbylaan ’n deurpad is.

Wat van Willem Bothalaan? Muldersmile? Enige inwoner van Saxbylaan sal kan bevestig dat die straat misbruik word deur jaagduiwels wat vanaf Wierdaweg kan jaag tot by die robot – ongehinderd.

Dit word graag gedoen in die vroegoggend tussen 01:00-04:00.

Derdens is die straatligte wes van die robot tot by die besigheidsentrum buite werking.

Dit is vir enige voetganger uiters gevaarlik… Saxbylaan is deesdae ’n ramp wat wag om te gebeur.

Is dit nodig dat daar eers ’n noodlottige ongeluk moet gebeur voordat ons dierbare amptenare optree?

Inwoner van Saxbylaan

Latest News

COMMENTS

Top
Recommended Story x
Six in court for Centurion murder